‘yan Najeriya na ci gaba da dakon sakamakon zaben shugabancin kasa da na yan majalisu

A yayin da hukumar zabe mai zaman kanta ta kasa INEC za ta fara tattara sakamako zabe a yau yan Najeriya na ci gaba da dakon sakamakon zaben shugabancin kasa da na yan majalisu da aka kada tun a ranar Asabar din da ta gabata.

A cewar hukumar zaben da misalin karfe 11 na safiyar yau Litinin ne za a fara sanar da sakamakon zabukan shugaban kasa da na ‘yan majalisun tarayya a hukumance.

Yayin da hukumar ta INEC ke cigaba da aikin tattara sakamakon zabukan da aka gudanar, a jiya Lahadi an bai wa jama’a damar kada kuri’unsu a wasu mazabu da ke kananan hukumomi 10 na jihar Zamfara, inda jama’a suka kasa yin zaben a ranar Asabar.

Haka kuma INEC ta ce za ta bayyana sabbin ranakun da za a sake gudanar da zabukan shugaban kasa da na ‘yan majalisar wakilai da dattijai, a wasu yankuna na jihohin Anambra da Rivers da Lagos sakamakon rikicin da aka samu da kuma sace akwatinan zabe.