‘Yan Sanda sun fafata da ‘yan fashi da makami a hanyar Maiduguri zuwa Kano

Rundunar ‘yan sandan Jihar Jigawa ta tabbatar da cewa jami’anta sun fafata da wasu ‘yan fashi da makami da suka datse hanyar Maiduguri zuwa Kano.

Lamarin ya faru ne a daidai ofishin ‘yan sanda dake kauyen Dindibis Fanisau a karamar hukumar Dutse.

Mai magana da yawun rundunar ASP Lawan Shisu Adamu ne ya bayyana hakan ta cikin wata sanarwa da ya fitar.

ASP Lawan Shisu ya ce lamarin ya faru ne da misalin karfe tara na daren lahadin da ta gabata inda kafin zuwan ‘yan sanda sai suka harbi wani mai suna Harisu Aliyu a wuyansa da kuma kafadarsa, a yayin da suka kashe Major M S Ismail ta hanyar harbinsa da bindiga.

Ta cikin sanarwar mai magana da yawun rundunar ta Jigawa Lawan Shisu ya ce tuni jami’an sojoji da na rundunar dake yaki da masu aikata fashi da makami suka dukufa wajen neman ‘yan fashin bayan da suka tsere cikin daji lokacin faruwar lamarin.