Garkuwa da Mutane: ƴan sanda sun kama waɗanda ake zargi da sace uwa da jaririyarta a Adamawa

Rundunar ‘yan sandan Jihar Adamawa ta tabbatar da kama mutane hudu da ake zargi da yin garkuwa da wata mata mai suna Hauwa Umaru da jaririyarta.

Mai magana da yawun rundunar DSP Sulaiman Nguroje ne ya sanar da hakan a Yola, inda ya ce mutanen da aka kama su ne suka kai hari ofishin ‘yan sanda na Nguroje a ranar 10 ga watan Oktoban 2021, dauke da manyan bindigogi.

DSP Sulaiman ya ce sun kama masu garkuwa da mutanen dauke da bindiga kirar AK-47 da tarin albusurusai, kuma suna cikin mutane bakwai da suka addabi Jihohin Adamawa da Taraba.

Ya kara da cewa da zarar sun kammala bincike za su gurfanar da su gaban Kotu don hukunta su.