Yanzu-yanzu: An ceto matashin da ya rataye kansa a Kano

Rahotanni daga unguwar Ƴan Kaba da ke nan Kano na cewa an samu wani matashi ya rataye kansa a jikin bishiya

Matashin ɗan shekaru 29 mai suna Mukhtar Umar ya rataye kan nasa ne a daren ranar Asabar.

Daga bisani ne kuma al’umma suka farga, suka sanar da jami’an tsaro, inda baturen ƴan sanda na Bompai SP. Aliyu Musa ya jagoranci ƴan sanda domin ceto shi.

Jami’in hulɗa da jama’a na ƴan sandan Kano DSP Abdullahi Haruna Kiyawa ya shaida wa Freedom Radio cewa, ƴan sanda sun ceto matashin cikin ƙoshin lafiya.

Sai dai a cewar sa, ƴan uwan matashin sun shaida musu cewa ya taɓa samun larurar ƙwaƙwalwa saboda ta’ammali da miyagun ƙwayoyi.

DSP. Kiyawa ya ce, yanzu haka sun shiga faɗaɗa bincike kan matashin domin ɗaukar matakin da ya dace.