Za a kammala hanyar Abuja Kaduna zuwa Kano kafin 2023 – Buhari

Gwamnatin tarayya ta ce za a kammala aikin sake gina hanyar Abuja zuwa Kaduna zuwa Kano a cikin zangon farko na shekarar 2023.

Karamin Ministan Ayyuka da Gidaje Aliyu Abubakar ne ya bayyana hakan a a jiya Alhamis yayin da yake duba bangare na uku na aikin daga Zariya zuwa Kano.

Ya ce kammala aikin hanyar, na daya daga cikin abubuwan da gwamnatin Shugaba Muhammadu Buhari za ta bai wa fifiko a yanzu.

A cewarsa, saboda muhimmantar da aikin hanyar, ministan ayyuka da gidaje Babatunde Raji-Fashola ya ziyarci wajen da ake gudanar da aikin tare da tawaga ta musamman, inda kuma wasu Injiniyoyi suka ziyarci aikin don kara tantancewa.

Aliyu Abubakar ya kuma ce, jajircewar na a matakin ganin an kammala aikin kafin karshen gwamnatin shugaba Buhari.