Za mu koma amfani da Drone wajen dakile ta’addance- IGP

Rundunar ‘yan sandan kasar nan, ta ce, ta na gab da kaddamar da kyamarorin tsaro na Drone domin magance matsalolin ta’addanci a fadin Najeriya.

Babban Sufeton ‘yan sanda na kasa Kayode Egbetokun, ne ya bayyana hakan yayin da ya ke gabatar da mukala a jami’ar Ibadan da yammacn Litinin din makon nan.

Ya ce, duk da cewa, rundunar na da irin wadannan kyamarori, amma nan ba da jimawa ba rundunar za ta mayar da hankali kacokan kan amfani da na’urorin na Drone domin sanya ido a ko ina daga babbar shalkwatarta da ke birnin tarayya Abuja.

Babban Sufeton ‘yan sandan, ya kara da cewa, yin amfani da wannan tsari zai taimaka musu wajen hango bata gari duk lokacin da suke aikata laifuka.