Zafin Kishi : Uwargida ta bankawa gidan Amarya wuta a Kano

Ana zargin wata uwargidan da bankawa gidan kishiyarta wuta da yammcin jiya Lahadi a yankin Liman Gwazaye dake karamar hukumar Kumbotso a jihar Kano.

Shaidun gani da Ido sun bayyana wa Freedom Rediyo cewa, matar da ake zargin ta fito ne daga gidan bayan anfara neman daukin kashe gobarar Daga makota.

A cewar su amaryar taje unguwa ne kafin faruwar lamarin da yammacin ranar Lahadi.

Shima Mai Gidan Malam Iliyasu Abdullahi Umar, ya bayyana cewar lokacin da zai tafi kasuwa ya bar mukullin gidan a gurin Uwargin sa, kasancewar Ya kai amaryar domin taga gida bayan watanni uku da Aurensu.

Da wakilin mu ya zanta da Amaryar da ake zargin gidan nata ya kone tace akwai bukatar mata su rage kishi kasancewar tana zargin kishiyar tata ce ta kunna mata wutar wacce tayi sanadiyar konewar kayan dakinta baki daya sai kujeru biyu da suka rage kawai.

Wakilinmu Abba Isah Muhammad, ya rawaito cewa, da ya yi kokarin jin tabakin wacce ake zargin amma hakan ya faskara sakamakon Awon gaba da ‘Yansanda suka yi da Ita don gudanar da bincike.

Sai dai da wakilin mu ya tuntubi Kakakin rundunar ‘Yansandan Kano DSP Abdullahi Haruna, ta wayar tarho bai sami sukunin daga wayar ba.