Zamu fara binciken yan majalisu zagaye na uku-ICPC

Hukumar yaki da ci hanci da rashawa ta ICPC ta kasa, ta sanar da fara binciken aiyyukan ‘yan majalisun tarayya karo na uku a yau.

Mai magana da yawun hukumar Uwargida Azuka Ogugua,ce ta bayyana hakan a Abuja.

Ta ce an fara gudanar da bibiyar aiyyukan ne karo na farko tun shekarar 2019, a jihohi 12 na kasar nan.

Azuka tace a karo na farko an duba aiyyuka 524, ya yinda a karo na biyu aka duba 822 a jihohi 16, da aka kwato Biliyoyin nairori da akayi almundahar aikin su.

Aikin bibiyar da binciken karo na uku yanzu za a gudanar da shi jihohi 17, da suka hada da Katsina , Kano, Sokoto, Yobe da Adamawa da Plateau da Kogi.

Sauran jihohin, sun hadar da Benue sai Ondo da Osun da Lagos, da Bayelsa da Akwa Ibom da Enugu sai Edo da Imo da Birnin tarayya Abuja.