Zan hada hannu da sauran jami’an tsaro don shawo kan matsalar tsaron a Nijeriya- Air Vice Marshal Hassan

Sabon babban hafsan sojin saman Nijeriya Air Vice Marshal Hassan Abubakar ya ce zai bi sahun wasu daga magabatansa domin ciyar da ayyukan rundunar gaba.

Air Vice Marshal Hassan Abubakar ya bayyana hakan ne jiya Alhamis yayin da yake shiga ofishinsa don fara gudanar da ayyukan sa a matsayin sabon babban hafsan sojin saman.

Air Vice Marshal Hassan ya kuma ce ‘rundunar zata hada gwaiwa da sauran takwarorinta domin shawo kan matsalar tsaro data ki ci taki cinyewa’.

Ya ce ‘a tsawon wa’adin da zai shafe akan mukamin zai fi maida hankali ne wajen kawo karshen ayyukan ta’addanci da suka mamaye wasu yankunan kasarnan’.

Rahoton: Mukhtar Abdullahi Birnin Kudu