Ziyarar sabon Shugaban Civil Defence fadar sarki Kano

Martaba Sarkin Kano Alhaji Aminu Ado Bayero, yayi kira da hakimai da dagatai da masu unguwanni dasu bawa sabon kwamandan hukumar Civil Defence hadin kai domin tabbatar da ya gudanar da aikinsa yadda ya kamata’.

Sarkin ya bayyana hakan ne yayin daya karbar sabon kwamandan hukumar Civil Defence Muhammad Lawan Falala daya ziyarce shi a fadar sa.

Alhaji Aminu Ado Bayero yace ‘aikin da hukumar Civil Defence takeyi yana da matukar mahimmanci wajen kula da rayuka da dukiyoyin al’ummar jihar nan’.

A nasa jawabin sabon kwamandan hukumar Civil Defence din Muhammad Lawan Falala yace ‘ya ziyarci masarautar Kano ne domin Neman hadin Kan masarautar, tare da samun goyon bayan ta wajen gudanar da aikinsa ka’in da na’in a jihar kano’.

Sabon kwamandan yana tare da dukkanin manyan jami’ansa a yayin da ya Kai wannan ziyara.

Rahoton: Shamsu Da’u Abdullahi