Ƴan bindiga sun sake yin garkuwa da mutane a Kaduna

Wasu gungun ƴan bindiga, sun ƙara sace mutane sittin da ɗaya a yankin ƙaramar hukumar Kajuru ta jihar Kaduna.

Rahotonni sun bayyana cewa, ƴan bindigar sun kai harin ne garin Buda ranar Litinin ɗin makon nan da daddare inda suka buɗa wuta, kamar yadda wasu mazauna yankin suka shaida wa manema labarai.

BBC ta ruwaito cewa, sai dai babu wata sanarwa daga hukumomin jihar da kuma jami’an rundunar ƴan sandan jihar kan tabbatar da kai harin.

Haka kuma wasu mazauna yankin sun ce, ƴanbindigar sun yi wa garin ƙawanya ne da misalin karfe 11:30 na dare tare da riƙa yin harbin kan mai uwa da wabi.