Ƴan sanda sun ceto mutane daga hannun ƴan bindiga a Zamfara

Rundunar ƴan sandan jihar Zamfara ta kuɓutar da wasu mutane 8 daga hannun masu garkuwa da mutane.

Jami’in hulɗa da jama’a na ƴansandan jihar SP. Shehu Mohammed ne ya sanar da hakan a wata sanarwa da ya fitar a ranar Litinin.

Sanarwar ta ce, a ranar 25 ga watan Agustan da muke ciki ne, ƴan bindiga suka sace mutanen 8 a garin Kangon Sabuwa da ke ƙaramar hukumar Bungudu.

SP. Shehu Mohammed ya ƙara da cewa, an kuɓutar da mutanen cikin ƙoshin lafiya, har ma an miƙa su ga iyalansu.