Ƴan Sanda sun far wa wakilan Daily Trust da BBC a kotun sauraren zaɓen gwamnan Kano

Jami’an ƴan sanda sun far wa ’yan jaridar kafofin yada labaran Daily Trust da takwaransa na BBC a yayin da suka ke daukar rahoto a kotun sauraron kararrkin zaben gwamnan Kano, wadda a yau Laraba za ta yanke hukunci.

Zahraddeen Lawan na BBC da Salim Umar Ibrahim na Daily Trust, sun fuskanci hakan ne daga ’yan sandan da aka girke a wurin da kotun za ta yi zaman.

Da farko ’yan sandan sun umarci ’yan jaridar su yi nesa da baya da kimanin mita 10.

Ana cikin haka ne wasu daga cikin jamia’n tsaro suka fara cin mutuncin ’yan jaridar, wai suna daukar hoto.

’Yan sandan sun yi cakumi wakilin BBC suna kokarin kwace wayarsa daga aljihunsa,a yayin da wasu suka nemi kwace wayar takwaransa na Daily Trust, inda a garin haka suka fasa fuskar wayar.