Ƴan sanda sun kama masu sayowa ƴan bindiga man fetur a Katsina

Rundunar ƴn sandan jihar Katsina ta kama wasu mutane 5 da ta ke zargin suna kai wa ƴan bindiga man fetur.

Kazalika rundunar ta zargi cewa su ma suna da alaƙa da yin garkuwa da mutane.

Mai magana da yawun rundunar SP Gambo Isah ne ya sanar da hakan ta cikin wata sanarwa.

Ya ce, a ranar 18 ga watan Satumba rundunar ta samu nasarar cafke guda daga ciki a Maraɗi ta jamhuriyar Niger, sai kuma wani a Magamar Jibia dukkanin su ɗauke da man fetur akan babura.

Kazalika an kama ɗayan a ƙauyen Daddara da ke Jibia shi ma zai kai wa ƴan bindigar Mai a cikin motar sa, sai wani a ƙauyen Anguwan Nakaba a ƙaramar hukumar Sabuwa.

Isah ya kuma ce, rundunar ta kama wani ɗan shekara 30 a Sabon Garin MotsoMotso a ƙauyen Zandam da ke ƙaramar hukumar Jibia da laifin kai wa ƴan bindiga bayanai da kuma sayo musu burodi.