Abin da tsohon shugaban ƙasar Najeriya Buhari yayiwa kano abin a yaba ne -ACF

Ƙungiyar tuntubar juna ta Arewa Consultative Forum ta ce abin da tsohon shugaban kasar Najeriya General Muhammad Buhari yayiwa jihar Kano abin a yaba ne wajen samarwa da jihar abubuwan ci gaba da zasu ingata rayuwar al’ummar jihar dama ƙasa baki ɗaya.

Shugaban ƙungiyar reshen kano Dakta Gwani Farouk Umar ne ya bayyana hakan yayin wata ziyara da ƙungiyar ta kaiwa tsohon shugaban ƙasar Najeriya General Muhammad Buhari gidan sa da yake a Daura.

Dakta Gwani Farouk ya kuma ce la’akari da irin abubuwan da suka haɗar da layin dogo da ya tashi daga kano zuwa Kaduna kano zuwa Daura da kuma bututun gas da aka janyo zuwa kano da sauran wasu ayyuka to ya zama wajibi wannan ƙungiyar reshen kano ta yaba masa.

Da yake jawabi tsohon shugaban ƙasar Muhammad Buhari godewa ƙungiyar yayi bisa ziyara da suka kawo masa, inda yayi fatan ƙungiyar zata mayar da hankali wajen kawowa arewa ci gaba da ƙasa baki ɗaya.

Yayin ziyarar ƙungiyar ta sami rakiyar mambobin ƙungiyar dake jihar kano dama ƙasa baki ɗaya domin ƙara godewa tsohon shugaban ƙasar na Najeriya Muhammad Buhari.