Adamawa United: Za mu inganta inshorar ‘yan wasa

Shugaban kungiyar kwallon kafa ta Adamawa United Emmanuel Zira, ya ce, kungiyar zata mayar da hankali wajen inganta inshorar ‘yan wasan ta yayin da ake tinkarar gasar cin kofin kwararru ta kakar wasa ta 2020/2021 a Najeriya.

Zira ya kuma ce, kungiyar za tayi kokari wajen ganin ta cika ka’idojin da kamfanin LMC dake shirya gasar ya tanada don samun lasisi.

LMC dai ya wallafa jerin ka’idojin da kowace kungiya dake buga gasar zata cika a shirye-shiryen fara gudanar da gasar ta kakar wasa mai zuwa.

Wasu daga cikin ka’idojin sun hada da mallakar kudi Naira miliyan 200 tare da tsarin ingantacciyar inshorar ‘yan wasa kafin a fara gasar a watan Nuwamba.