An kulla yarjejeniyar aiki tsakanin BUK da gidan Zoo

Gwamnatin jihar Kano ta kulla yarjejeniyar inganta dabbobi da jami’ar Bayero a wani mataki na kara fadada ilimin yadda za a kula da dabbobin.

Manajan daraktan kula da gidan Zoo a nan Kano Sadi Kura Muhammad ne ya bayyana hakan a ranar Litinin, jim kadan kammala kulla yarjejeniyar a tsakanin su.

Ya ce, yarjejeniyar za ta taimaka wajen samun dabarun inganta dabbobin daji da na gida.

“Muna sane da cewa kowanne gidan adana namun daji makaranta, domin ana zuwa domin a samu ilimi, sai dai mun yanke hukuncin yin hulda da BUK ne domin su taimaka mana wajen yin bincike da samar da sinadaran da za su taimawa wajen bunkasar dabbobin” a cewar Kura Muhammad.

Ya kuma ce, matukar yarjejeniyar ta cimma nasara, al;ummar jihar Kano za su fi kowa amfana da ita.

A nasa bangaren shugaban jami’ar Bayero Farfesa Sagir Adamu Abbas ya ce, jami’ar Bayero za ta amfana ta fannin bincike da nazari na rayuwar dabbobi.

haka kuma, jami’ar za ta samu karin wasu dabbibin da bata da su a baya.

“Wannan yarjejeniya ina mai tabbatar muku za ta samarwa jihar Kano kudin shiga, domin kuwa da zarar mun fara aiwatar da ita dabbobi za su habaka, mutane za su rika zuwa kallo daga ko’ina a fadin kasar nan”. A cewar Farfesa Sagir

Jim kadan bayan kammala kulla yarjejeniyar, hukumomin jami’ar Bayero sun gazaya gidan Zoo din don ganin yadda dabbobin suke rayuwa.