An yi jana’izar daliban da suka rasa rayukansu a wani hatsari a jihar Kano

Da maraicen jiya ne aka gudanar da jana’izar daliban nan ashirin da daya da malaman su uku wadanda suka rasa rayukan su a wani hatsarin mota da ya ritsa da su a yankin karamar hukumar Gaya da ke nan jihar Kano.

Rahotanni sun ce an gudanar da jana’izar daliban ne a fadar Sarkin Misau da ke garin na Misau a jihar Bauchi.

Kamfanin dillancin labarai na kasa NAN ya ruwaito cewa dubban mutane ne suka halarci jana’izar wanda limamin babban masallacin juma’a na garin Misau Sheikh Usman Baba ya jagoranta.

Daliban dai sun rasa rayukansu ne a jiya sakamakon wani mummunar hatsarin mota da ya ritsa da su a yankin karamar hukumar Gaya lokacin da suke komawa gida bayan kammala wata ziyarar karin ilimi da suka kawo nan jihar Kano wato Excursion.