Ba ma shiga ayyukan wasu hukumomi da niyyar cin zarafin jama’a – KAROTA

Hukumar lura da zirga-zirgar ababen hawa a jihar kano ta ce ba wai tana shiga ayyukan wasu hukumomi bane da niyyar cin zarafin jama’a.

Sai dai akwai ayyuka da dama da take aiwatarwa tare da hadin gwiwar wasu hukumomi, musamman ayyukan irin na jami’an tsaro da kuma KNUPDA wadda ke lura da ayyukan tsara birane.

Shugaban Hukumar KAROTA, Baffa Babba Dan-Agundi shine ya bayyana haka a tattaunawarsa da Freedom radio da safiyar yau Talata.

Baffa Babba Dan-Agundi , ya ce akwai doka da ta bawa jami’an KAROTA damar cafke duk wani mai laifi tare da mika shi ga hukumomin tsaron da abun ya shafa.