Ba za ku fahimci manufofi na ba, sai na sauka daga mulki – Buhari

Shugaban ƙasa Muhammadu Buhari ya ce ba za a fahimci tasirin ayyukan da yake yi ba, sai bayan ya sauka daga mulki a shekara ta 2023.

Shugaban ya bayyana hakan ne a lokacin naɗin sabbin shugabannin hukumar kula da asusun zuba jarin ƙasashen waje a Najeriya NSIA.

Shugaba Buhari ya jaddada matsayin gwamnatinsa na kirkiro ayyukan ci gaban ƙasa, inda ya ce, a yanzu ba za a fahimci tasirin ayyukan da yake bijiro da su ba har sai lokacin da ya bar kan karagar mulki.

Kalaman shugaba buhari na zuwa ne a daidai lokacin da ƴan Najeriya ke ta bayyana ra’ayoyin su kan sauke ministocin sa biyu da yayi daga kan muƙaman su, tare da maye gurbin su da wasu.