Ganduje zai dauki matakin ladaftarwa akan shugabannin tashar mota

Gwamnatin Jihar Kano ta baiwa shugabannin tashar mota ta Rijiyar Zaki wa’adin mako guda da su tabbatar da tsaftace ciki da wajenta, ko kuma ta dauki matakin ladaftarwa a kansu.

Kwamishinan muhalli na Jihar Kano Dakta Kabiru Ibrahim Getso ne ya ba da umarnin yayin duban tsaftar muhalli na kasuwanni da asibitoci da ma’aikatun gwamnati, wanda ake gudanarwa a karshen ko wane wata.

Kwamishinan wanda babban sakatare a ma’aikatar Adamu Abdu Faragai ya wakilta, ya ce gwamnati ba za ta lamunci barin datti a wuraren hada-hadar jama’a ba, a don haka za ta dauki mataki kan masu karya dokar tsaftar muhalli.