Buhari ya amince da bai wa gidajen Rediyo da Talabijin 159 lasisi

Shugaban ƙasa Muhammadu Buhari ya amince da bai wa gidajen Redio da Talabijin guda 159 lasisi, don fara aiki a ƙasar nan.

Shugaban hukumar kula da kafafen yaɗa labarai ta kasa NBC Malam Balarabe Illela ne ya bayyana hakan ta cikin wata sanarwa da ya fitar a Talata a Abuja.

Balarabe Illela ya ce matakin da shugaba Buhari ya ɗauka na sahalewa gidajen Talabijin da Rediyon ya yi daidai da dokokin hukumar ta NBC da aka yi wa kwaskwarima na shekarar 2004.

Ya kara da cewa yanzu haka dai kafofin yada labarai na Redio da Talabijin a ƙasar nan sun kai 625.