NBC na tuhumar Channels TV da saɓa doka

Hukumar kula da kafafen yada labarai ta kasa ta aikewa da gidan talabijin na Channels takardar tuhuma.

Wannan ya biyo bayan wasu kalamai da gwamnan jihar Benue Samuel Ortom yayi a wani shirin safe da suke gabatarwa.

Hukumar ta bayyana hakan ta cikin takardar tuhumar da ta aikewa gidan talabijin din a yau, mai ɗauke da sa hannun shugaban ta Balarabe Ilelah.

NBC ta ce, gidan talabijin din ya saɓa ka’idar aiki, sakamakon yadda ya bar gwamnan ya yi wasu kalaman tunzuri wadanda ba su kamata ba a ranar Talatar da ta gabata.

A don haka hukumar ta buƙaci gidan Talabijin na Channels yayi bayanin dalilin da yasa bai yi amfani da dokokin yaɗa labarai da suka dace ba, wajen gabatar da shirin.