Dokin zuciya: Matashiya ta kashe ƙawarta a Kano

Wata matashiya da ke unguwar Maidile anan Kano ta kashe ƙawarta ta hanyar yi mata yankan rago.

Lamarin dai ya faru ne bayan da rigima ta kaure a tsakaninsu a daren ranar Alhamis.

Tun da fari matashiyar da ta aikata kisan ta jife kawarta ta mai suna Bahijja da kalmar “Karuwa” inda ita kuma Bahijja ta mayar da martani.

Daga nan ne rikici ya kaure a tsakanin su, kuma nan take ƙawar ta ɗauko wuƙa bai Bahijja har gida tare da yi mata yankan Rago.

Sai dai ko da aka garzaya da Bahijja Asibiti don samun taimakon gaggawa tuni rai yayi halin sa.

Tuni rundunar yan sandan jihar Kano ta samu nasarar cafke wadda ake zargi tare aikewa da ita sashin binciken manyan laifuka, kamar yadda mai magana da yawun rundunar DSP Abdullahi Haruna Kiyawa ya shaida.