EFCC ta ayyana neman Yahaya Bello ruwa a jallo

Hukumar EFCC, ta ayyana neman tsohon Gwamnan jihar Kogi, Yahaya Bello, ruwa a jallo.

Daukar wannan matakin na zuwa ne sa’o’i kadan bayan da kotu ta dage sauraron karar da hukumar ta EFCC ta shigar sakamakon rashin halartar zaman kotun da tsohon gwamnan ya yi.

Yayin zaman kotun na ranar Alhamis, lauyan EFCC mai suna Kemi Phinro ya faɗa mata cewa “wani mutum da ke da kariya daga tuhuma ne ke bai wa tsohon gwamnan mafaka”.

Tun a baya dai, hukumar ta yaki da cin hanci da rashawa ta EFCC ta na tuhumar Yahaya Bello ne da zargin halasta kudin haram da suka kai naira biliyan 8 da miliya 200.

BBC ta ruwaito cewa, Lauyan hukumar ya bayyana cewa suna duba yiwuwar neman taimakon rundunar soji domin cafke Yahaya Bello.