EFCC ta gurfanar da Wani gaban Kotun a Kano

Hukumar yaki da masu yiwa tattalin arzikin kasa zagon kasa EFCC ta gurfanar da Umar Bello Sadiq a gaban babbar kotun jihar Kano, karkashin mai shari’a Zuwaira Yusuf bisa zargin sa da laifukan damfara.

An gurfanar da Umar Bello ne tare da kamfaninsa Marula Global Links bisa zargin karbar naira miliyan 20 daga hannun mai dakin mai martaba Sarkin Bichi, Farida Nasir Ado Bayero da sunan zuba jari a fannin ma’adanai, inda daga bisani ya karkatar da kudaden.

Lauyan masu gabatar da kara, Sadiq Kurawa ya bukaci kotun da ta sanya ranar fara sauraren shari’ar, yayin da lauyan wanda ake zargi ya bukaci kotun ta bada belin wanda yake karewa.

Mai shari’a Zuwaira Yusuf ta amince da bada belin wanda ake kara kan kudi naira dubu dari biyar tare da mutane biyu da zasu tsaya masa daga ‘yan uwansa na jinni, tare da sanya ranar 24 ga watan Nuwanba domin fara sauraren karar.