EFCC ta kafa sashen sa ido kan kuɗaɗen jihohi don daƙile cin hanci

Hukumar da ke yaƙi da masu yi wa ƙasa zagon ƙasa a Najeriya (EFCC) ta ce ta kafa wani sashe na musamman da zai riƙa sa ido kan shigar da fitar kuɗaɗen gwamnatocin jihohi a wani ɓangare na ƙoƙarinta na hana cin hanci da sauran laifukan kuɗi.

Shugaban hukumar, Ola Olukoyode, ne ya bayyana hakan yayin da yake gabatar da wata maƙala ta musamman domin murnar cika shekaru 30 da kafuwar jihar Zamfara a birnin Gusau.

Ya ce a yanzu EFCC tana mayar da hankali wajen hana afkuwar laifukan kuɗi tun kafin su faru, maimakon taƙaita aikinta ga gurfanar da masu aikata laifuka bayan an wawure kuɗaɗen gwamnati.

A cewarsa, sabon sashen da aka kafa zai riƙa bibiyar harkokin kuɗaɗen gwamnatocin jihohi domin hana karkatar da dukiyar alʼumma da kuma almundahanar kuɗaɗen gwamnati.

Olukoyode ya ce matakin na da nufin inganta gaskiya, riƙon amana da kuma tabbatar da ana tafiyar da kuɗaɗen alʼumma yadda ya kamata.