El-rufa’i ya sanya hannu kan dokar dandaka ga masu fyade

Gwamnan Jihar Kaduna Nasir El-Rufa’i ya sanya hannu kan dokar da aka yi wa kwaskwarima ta hukunta masu aikata laifin fyade musamman ma ga kananan yara.
Hukuncin dai ya hadar da yin dandaka da kuma hukuncin kisa ga duk namijin da aka kama da laifin yin fyaden.
A ranar larabar makon jiya ne dai majalisar dokokin Jihar ta amince da gyaran dokar, sannan aka aikewa gwamnan domin sanya hannu a kai.
Ko a ranar alhamis din da ta gabata mun kawo muku tattaunawa da kwamishiniyar mata ta Jihar Kaduna Hajiya Hafsat Baba, tana mai cewar dama can a shirye gwamnan yake domin sahalewa dokar.