FIFA za ta duba yuwuwar gudanar da gasar cin kofin Duniya duk bayan shekaru 2

Hukumar kwallon kafa ta Duniya FIFA ta gayyaci masu horar da ‘yan wasan kwallon kafa na kasashe 211, don tattaunawa kan yadda za a sauya fasalin gudanar da gasar cin kofin duniya duk bayan shekaru 2.

Kamar yadda FIFA ta sanar a ranar Litinin 18 ga watan Oktobar 2021, ta ce tana son a bayar da shawara kan yadda ya kamata a tsara gasar da kuma gyara kalandar wasannin cin kofin Duniya.

Za dai a gudanar da taron ne ta dandalin sadarwa na zoom daga yau Talata 19 zuwa ranar Alhamis 21 ga watan Oktobar 2021.

Tsohon mai horas da ‘yan wasan kungiyar kwallon kafa ta Arsenal kuma shugaban bunkasa harkokin kwallon kafa na hukumar kwallon kafa ta Duniya FIFA, Arsene Wenger ne zai jagoranci tattaunawar.