Ganduje ya gargaɗi Kwalejin fasaha kan rashin tsafta

Gwamnatin jihar Kano ta gargadi kwalejin fasaha ta jihar Kano School of Technology da ta kula da tsaftar makarantar don kiyaye lafiyar dalibai.

Kwamishinan muhalli Dakta Kabiru Ibrahim Getso ne ya bayyana hakan lokacin da ya kammala zagayen duban tsaftar muhalli a Kwalejin.

Ya ce “Babbar rashin tsaftar da kwalejin ta nuna a yau shi ne yadda aka bar ciyawa ta yi tsayi ba tare da an cire ta”.

“Wannan ciyawa da aka bari barazana ce ga lafiyar ɗalibai domin kuwa macizai za su iya samun mafaka a ciyawar su kuma cutar da ɗalibai”a cewar Getso.

Kwamishinan ya kuma ce “Kamata yayi a yi amfani da wannan lokaci da ɗaliban kwalejin su ke hutu wajen tsaftace muhallin amma duk da haka an samu datti a kwalejin”.

Dakta Kabiru Ibrahim Getso ya buƙaci kwalejin da ta ɗauki matakin gyara kafin a sake waiwayo su.