Jami’ar Bayero ta ƙara wa’adin komawar ɗalibai makaranta

Jami’ar Bayero da ke Kano ta ƙara wa’adin komawar ɗaliban ta zangon shekarar 2021 da 2022.

Hakan na zuwa ne a lokacin da aka kammala zaman majalisar zartarwar makarantar karo na 392 a ranar laraba, inda aka mayar da komawar ɗaliban a ranar 1 ga watan Nuwambar 2021.

Jami’in yaɗa labarai na jami’ar Malam Lamara Garba ne ya bayyana hakan, a wata sanarwar da jami’ar ta fitar,wanda magatakardar jami’ar Malam Jamilu Ahmad Salim ya sanyawa hannu.

Matakin dai ya biyo bayan rashin sakin sakamakon ɗaliban sakandire na bana.
A baya dai jami’ar ta sanya ranar 4 ga watan Oktobar shekarar 2021 a matsayin ranar komawar ɗaliban sai dai kuma an ɗage har zuwa 1 ga watan Nuwamba shekarar 2021.