Da dumi-dumi : Ganduje ya sanya dokar yin kulle a Kano

Gwamnan jihar Kano Abdullahi Umar Ganduje ya sanar da rufe jihar na tsahon kwanaki 7 a wani bangare na rage yaduwar Coronavirus a jihar ta Kano.

Bayanin hakan na kunshe ne cikin wata sanarwa da Sakataren yada labaran Gwamnan jihar Kano Malam Abba Anwar ya fitar.

Sanarwar ta kuma ce rufe jihar zai fara aiki ne daga ranar Alhamis 16 ga watan Aprilu zuwa ranar Ashirin da uku ga watan na Afrilu.

Sanarwar ta kara da cewa gwamman na Kano Abdullahi Umar Ganduje ya ce hana shige da ficen zai fara aiki ne daga karfe goma na daren ranar ta Alhamis.

Hakan na zuwa ne dai dai lokacin da aka samu Karin mutum daya dake dauke da cutar inda jumilla suka zama mutane hudu ke dauke da cutar a jihar ta Kano.