Gwamnatin Borno za ta ginawa fulani Ruga don kiwon dabbobi

Gwamnan Jihar Borno, Farfesa Babagana Umara Zulum ya amince da bayar da filin da za a gina Ruga a Jihar domin kiwon shanu da sauran dabbobi.

Babagana Zulum ya bayyana hakan ne lokacin da ya ziyarci ministan harkokin noma, Alhaji Sabo Nanono a ofishinsa da ke birnin tarayya Abuja, inda suka tattauna shirin gwamnatin tarayya a kan Ruga.

Ministan ya yabawa kokarin gwamnan har ma ya ba da tabbacin cewa gwamnatin tarayya za ta marawa shirin baya har zuwa kammalawa.

A yayin ziyarar, gwamna Babagana Zulum yana tare da kwamishinan harkokin kiwo, Modu Walama da mashawarcinsa kan harkokin kiwo, Tijjani Gwani Modu da kuma babban jami’in shirin Ruga na Jihar, Musa Inuwa Kubo.