Gwamnatin Kaduna ta saka dokar hana fita a yankin Chikun

Gwamnatin jihar Kaduna, ta sanar da sanya dokar hana fita ta tsawon sa’o’i ashirin da hudu a Sabon garin Nassarawa da Tirkaniya a ƙaramar hukumar Chikun.

Gwamnatin ta bayyana hakan ne ta cikin sanarwar da Kwamishinan ma’aikatar tsaro da harkokin cikin gida na jihar Mista Samuel Aruwan ya fitar yau Litinin.

Sanarwar ta ce, “An cimma wannan matsaya ne bisa tabarbarewar doka da oda da ta kai ga kashe wasu mutane biyu a wani rikici da ya ɓarke a garuruwan”.

Sanarwar ta kuma umarci hukumomin tsaro da su aiwatar da dokar hana fita a yankunan, domin dawo da zaman lafiya yayin da ake ci gaba da bincike, don haka gwamnatin jihar ta umarci al’ummar yankunan da su yi biyayya ga dokar hana fita a yankunan wadda ta fara aiki nan take.