Gwamnatin Kano za ta ƙaddamar da sabon tsarin bunƙasa masana’antu

Gwamnatin jihar Kano ta sha alwashin farfado da masana’antu da ke fama da matsalolin neman durkushewa ta hanyar tallafa wa masna’antun da ake da su tare da jawo masu zuba jari daga kasashen waje zuwa jihar.

Kwamishinan kasuwanci, zuba jari da masana’antu Alhaji Shehu Wada Sagagi, ne ya bayyana hakan yayin wata ziyarar aiki da hukumar tattara kudaden shiga ta jihar Kano KIRS ta kai masa a Talatar makon nan.

Alhaji Shehu Wada Sagagi, ya bayyana tsare-tsaren gwamnatin Gwamna Abba Kabir Yusuf na bunkasa masana’antu, “Ba da jimawa ba za mu bayyana tsarin manufofin da aka tsara don karfafa masana’antu a jihar,” in ji shi. “Bugu da kari kuma, za mu gudanar da cikakken kidayar duk masana’antu a Kano, wadanda suke aiki da wadanda ba su aiki ba. Wannan bayanan za su ba mu damar ganowa da magance takamaiman ƙalubalen da waɗannan kasuwancin ke fuskanta, tare da share fagen farfaɗo da ci gabansu mai dorewa.”

Da ya ke bayyana kudurin gwamnati na tallafa wa masana’antu da ake da su, Sagagi ya ce, “A jiya, na ziyarci Fortune Limited, masu samar da mafi kyawun shinkafa. Na ba su tabbacin cewa gwamnatin jihar za ta himmatu wajen bin hanyoyin da za su amfana da kudaden shirin farfado da tattalin arzikin gwamnatin tarayya. Wannan zai taimaka wa masana’antun da takunkumin shigo da kayayyaki ya shafa.”

Da yake jaddada mahimmancin hadin gwiwa tsakanin hukumomin, Alhaji Sagagi ya bayyana cewa, “Makasudin wannan ziyarar ita ce kafa dabarun hadin gwiwa tsakanin ma’aikatar kasuwanci, zuba jari da masana’antu da kuma hukumar tattara kudaden shiga ta jihar Kano.

Wannan haɗin gwiwar zai kasance mai mahimmanci don inganta samar da kudaden shiga ga jihar.” Ya kara da cewa, “Muna da burin inganta karfin ma’aikatanmu don samun ingantacciyar hanyar tattara kudaden shiga.

Haka kuma ya ce, Za mu kuma yi aiki kafada da kafada da Sabis na Kuɗi don ganowa da magance yuwuwar ɓarkewar kudaden shiga. Bugu da ƙari, za mu nemi jagorancin Gwamna don tabbatar da daidaito tsakanin ma’aikatun da suka dace, ciki har da Noma, Filaye, Kuɗi, da Kasafi da kuma Tsare-tsare.”

Kwamishinan ya kuma jaddada mahimmancin alhakin zamantakewar kamfanoni inda ya ce, “Za mu yi hulɗa tare da kamfanonin da ke aiki a cikin jihar, na gida da na waje, don jaddada rawar da suke takawa wajen ba da gudummawar ci gaban jihar ta hanyar samar da ayyuka masu ma’ana na zamantakewa.”

“Rashin cikakkun bayanai masu inganci yana hana ingantaccen tsari da tsara manufofi. Wannan gibin bayanai ya kuma iyakance ikonmu na ba da shawara mai kyau ga Ma’aikatar Kuɗi don inganta samar da kudaden shiga da kuma sanar da yanke shawara game da kasafin kuɗi na gwamnati.” in ji kwamishinan.

A nasa bangaren, Shugaban Hukumar tattara Harajin cikin gida na Jihar Kano, Dakta Zaid Abubakar, ya nuna jin dadinsa kan wannan hadin gwiwa. “Mun kuduri aniyar yin aiki kafada da kafada da ma’aikatar kasuwanci domin ciyar da jihar Kano gaba wajen bunkasar tattalin arziki,” in ji Dakta Abubakar, ya ce, “Karfafa hadin gwiwa tsakanin kungiyoyinmu ba shakka zai haifar da gagarumin ci gaba wajen samar da kudaden shiga ga jihar.

Daga karshe ya bayyana amincewarsa da kyakkyawan sakamakon wannan kokari na hadin gwiwa.