Haƙiƙanin abin da ya faru tsakanin Doguwa da Aruwa

Shugaban masu rinjaye na majalisar tarayya Alasan Ado Doguwa yayi wancakali da Kakakin jam’iyyar APC na Kano Ahmad S. Aruwa.

Lamarin ya faru ne yayin wani taron jam’iyyar inda Alasan Ado Doguwa ya gabatar da mahaifiyarsa ya bayyana cewa ita ce sirrin nasararsa a rayuwa.

Doguwa ya ce, biyayyarsa ga mahaifiyarsa ta sanya yake samun nasara a kan duk abin da ya sanya a gaba.

Ana ganin yayi hakan ne don martani da gugar zana, biyo bayan rikicinsu da mataimakin ɗan takarar Gwamnan APC Murtala Sule Garo.

A nan ne Aruwa ya yi ƙoƙarin zuwa wajen, a nan ne kuma Alasan Ado ya bi shi da mahangurɓa har ta kai sai da ƙyar aka ƙwace shi daga hannunsa.

Freedom Radio ta tuntuɓi Aruwa, ya ce, ya shigar da ƙarar Doguwa ga Gwamna Ganduje.