Harin gwamnan Benue ya shafi duk dan Najeriya – Buhari

Shugaban ƙasa Muhammadu Buhari ya yi tir da harin da aka kai wa Gwamnan jihar Benue Samuel Ortom.

Gidan talabijin na Channels ya rawaito mai magana da yawun shugaban ƙasar Malam Garba Shehu na cewa, kai hari ga ko wane ɗan Najeriya tamkar kai hari ne ga al’ummar Najeriya baki-ɗaya.

Shugaba Buhari ya ce, tuni ya umarci jami’an tsaro kan su zurfafa bincike game da lamarin, kuma wannan hari ba abu ne da za a mayar da shi batun siyasa ba, a’a batu ne da ya shafi jama’ar ƙasa baki-ɗaya.

A ƙarshe shugaban ya yi alƙawarin cewa, Gwamnatinsa za ta tabbatar an yi ƙwaƙƙwaran bincike a kai, tare da ɗaukar mataki a kan duk wanda aka samu da hannu a ciki.