Hatsarin kwale-kwale a jihar Kebbi: An tsamo gawarwaki 76

Hukumar kula da madatsun ruwa ta kasa (NIWA) ta ce, ya zuwa yanzu, masu aikin ceto sun samu nasarar tsamo gawarwaki 76, waɗanda suka rasa rayukansu yayin wani hatsarin jirgin kwale-kwale da ya faru a ranar larabar da ta gabata.

Hatsarin jirgin kwale-kwalen dai ya faru ne a cikin kogin Kwara a daidai kauyen Tsohuwar Labata da ke yankin ƙaramar hukumar Ngaski.

Manajan shiyya na hukumar ta NIWA mai kula da Yawuri, Birma Yusuf ne ya bayyana haka yayin zantawa da manema labarai.