Hudubar sallar juma’ar limaman Kano a yau ta mayar da hankali ne kan zakkar fidda kai

Mafi-akasarin limaman masallatan sun mayar da hankali ne kan batun zakkar fidda kai, wadda ake fitarwa a cikin kwanakin karshe na watan Ramadan.

A hudubarsa, limamin masallacin Juma’a na Zam-Zam dake Hotoro Gwani Zubair Hamza, ya bukaci al’umma da su fitar da Zakkatul fitr kamar yadda addinin musulunci ya umarta.

A ta sa hudubar limamin masallacin juma’a na Mukhtar Abbas dake Unguwar Farm Centre Malam Usman Adamu Kurna, ya bukaci al’umma da su dage wajen ribatar ragowar sauran kwanakin da suka rage na watan Ramadan.

Shi kuwa limamin masallacin juma’a na Kuyan ta Inna Malam Muhammad Aminu, kira ya yi ga al’umma da su rike darasin da suka koya a watan Ramadan, kuma su yi aiki da shi, kamar yadda wakilinmu Sani Ahmad Sagagi ya rawaito mana.

Limaman dai sun bukaci mawadata da su ci gaba da tallafawa marasa galihu dake cikin al’umma.