Hukumar jin dadin Alhazai ta musanta barkewar Amai da Gudawa ga Alhazan Kano

Hukumar kula da jin dadin Alhazai ta jihar Kano, ta musanta labarin da ake yadawa cewar cutar Amai da Gudawa ta barke a tsakanin Alhazan jihar.

Darakta janar na hukumar Alhaji Lamin Rabiu ne ya musanta barkewar annobar a zantawarsa da Freedom Radio.

Ya ce, abinda suka sani dai shi ne, mahajjata mutum Tara ne suka gamu da matsalar gurbacewar ciki da ta haifar musu da Amai da gudawa bayan cin wani Dambu mara inganci.

Shi ma a nasa bangaren, jagoran tawagar likitocin da ke kula da Alhazai a kasa mai tsarki Dakta Usman Shu’aibu Galadima, ya musanta zargin barkewar cutar ta Amai da Gudawa ga Alhazan Kano.

Rahoton: Abdulkarim Muhammad Tukuntawa.