Hukumar SEC za ta fara dakatar da kamfanonin da ba su sabunta rajista ba

Hukumar kula da hada-hadar kudade ta kasa SEC ta ce daga ranar 31 ga wannan wata na Mayu da muke ciki za ta dakatar da harkokin kamfanoni da ‘yan kasuwar da ba su sabunta rajistarsu da hukumar ba.

Wannan na cikin wata sanarwa da hukumar ta fitar a Abuja, inda ta ce tun daga ranar daya ga wannan wata na Mayu ta bude kofar sabunta rajistar, wadda za ta rufe a ranar 31 ga watan na Mayu.

Sanarwar ta kara da cewa hukumar za ta fitar da sunayen kafanonin da suka sabunta rajistarsu a shafinta na intanet da kuma jaridun kasar nan.