Hukuncin kisa ne ya fi dace wa ga masu fyade – Minista

Ministan kula da harkokin mata Pauline Tallen ta bukaci da a rika aiwatar da hukuncin kisa kan wadanda aka kamasu da laifin fyade.

Pauline Tallen ta bayyana hakan ne lokacin da ta ke kaddamar da shirin amfani da iskar gas wajen girki da kuma dashen itatuwa a garin Girei da ke jihar Adamawa a jiya juma’a.

Ministar ta bukaci da a rika daukan tsauraran matakai akan mutanen da ke bautar da kananan yara da sauran wasu laifuka da dama.

Da ta ke jawabi kan muhimmancin amfani da Gas wajen girki kuwa, ministar ta ce, a kididdigar da hukumar lafiya ta duniya WHO ta fitar, ta ce, akalla mutane miliyan hudu da dubu dari uku ne ke rasa rayukansu a duk shekara sanadiyar cututtukan da suke dauka sakamakon rashin amfani da gas wajen girke-girke.

Saboda haka ta ce shugaban kasa ya amince a bai wa kowace karamar hukuma a kasar nan tukunyar gas guda dubu daya don rabawa jama’a.