IPMAN ta janye daga yajin aikin data yi niyar shiga

Ƙungiyar dillalan Man Fetur ta Najeriya IPMAN, ta buƙaci mambobinta da su ci gaba da sayar da man Fetur kamar yadda suka saba.

Hakan na ƙunshe ne ta cikin wata sanarwar da ƙungiyar ta fitar a daren yau Talata mai ɗauke da sa hannun shugabanta Mohammed Kuluwa.

Sanarwar ta ce, “Bayan tattaunawa da hukumomi masu ruwa da tsaki, muna umartar gidajen mai da su buɗe tare da ci gaba da sayar da man fetur yayin da uwar kungiya za ta ci gaba da tattaunawa,”

Wannan dai na zuwa ne sa’o’i kaɗan bayan umarnin farko da ƙungiyar ta bai wa mambobinta na su rufe ilahirin gidajen man fetur a faɗin Najeriya.