Jami’an EFCC sun garƙame gidan Yahaya Bello domin cafke shi

Da tsakar ranar yau Laraba ne jami’an hukumar yaƙi da cin hanci da rashawa ta EFCC suka yi wa ƙofar gidan tsohon gwamnan jihar Kogi Yahaya Bello tsinke da nufin cafke shi.

Rahotonni sun bayyana cewa, jami’an na EFCC, sun yi amfani da gwamman motocinsu wajen rufe layin gidan tsohon gwamnan wanda ya ke a Benghazi Street a Wuse Zone 4 da ke birnin tarayya Abuja.

Haka kuma jami’an sun hana masu wucewa yin amfani da hanyar har zuwa kammala aikinsu.

Sai dai, jaridar Daily Trust ta ruwaito cewa akwai yiwuwar yunƙurin cafke Yahaya Bello ba shi da nasaba da tuhumar da hukumar ke masa ta almundahanar Naira Biliyan 48.