Jami’an tsaro sun cafke Sanata Dino Melaye a filin Jirgin saman Abuja

Jami’an tsaro sun cafke dan majalisar Dattijai mai wakiltar Kogi ta yamma Sanata Dino Melaye, a filin  Jirgin sama na Nnamdi Azikwe da ke birnin tarayya Abuja.

Sanata Dino Melaye ne ya sanar da hakan a shafinsa na twitter inda ya ce yana kan hanyarsa ta tafiya kasar Morocco ne domin ziyarar aiki sai jami’an tsaro suka kama shi, sannan daga bisani suka mika shi hannun ‘yan-sanda.

Sai dai wasu rahotanni sun bayyana cewa jami’an hukumar shige-da-fice ta kasa ne suka kama Sanata Dino Melaye.

A baya dai Rundunar ‘yan-sandan kasar nan ta ayyana Dino Melaye a matsayin wanda ta ke nema ruwa a jallo bisa zarginsa da hannu kan kisa tare kuma da mara baya ga wasu tsageru masu rike da makami.