Jami’an tsaro sun kashe wani kasurgumin dan ta’adda da yaransa

Rahotanni daga jihar Kebbi, sun bayyana cewa an hallaka wani kasurgumin ɗan bindiga mai suna Yellow, wanda ake zargin shi da yaransa sun addabi yankuna da dama a jihohin Neja da Zamfara da kuma Kebbi.

An dai halaka ja-goran ‘yan bindigan ne da wasu mukarrabansa uku, a wani karon batta da suka yi da jami’an tsaro a garin Wasagu na jihar Kebbi.

A zantawar wakilin Freedom Radio da daya daga cikin kwamandojin mafarautan yankin, ya bayyana cewa, tun farko ‘yan bindigar ne suka kai farmaki gidan wani mutum tare da dauke dansa,sai dai sun samu daukin jami;an tsaro a lokacin inda suka yi ta musayar wuta da bata garin har na fiye da mintina biyar.

Haka kuma ya kara da cewa, bayan kammala musayar wutar ne suka gano gawar kasurgumin dan bindigar tare da yaransa.