Jihar Abia tayi Allah wadai da harin da aka kai wa yan wasan Enyimba a Jos

Gwamnatin jihar Abia ta yi Allah wadai da farmakin da aka yiwa ‘yan wasan kungiyar kwallon kafa ta Enyimba a garin Jos dake jihar Plateau.

Lamarin dai ya afku ne bayan rashin nasara da suka yi a hannun kungiyar kwallon kafa ta Plateau United a ranar Lahadi 27 ga watan Yunin 2021, a gasar cin kofin kwararru ta Najeriya.

‘Yan wasan Enyimba biyu, mai tsaron baya Dare Olatunji da mai tsaron raga Sabirou Bassa-Djeri ne suka samu rauni yayin rikicin.

Rikicin ya biyo bayan jan kati da aka baiwa dan wasa Timothy Danladi sakamakon rashin kyautawa, lamarin ya sanya dan wasa yin fushi tare da ficewa daga filin hakan ya fusata magoya bayan Plateau United har ya kaiga rikici.