Jihar Kwara ce za ta karbi bakuncin gasar wasanni ta kasa a shekarar 2022 -Abdurrahman Abdurrazaq

Gwamnatin jihar Kwara ta ce itace za ta karbi bakuncin gasar wasanni ta kasa a shekara mai kamawa ta 2022.

Gwamnan jihar AbdulRahman AbdulRazaq ne ya bayyana hakan a ranar Talata 19 ga watan Oktoban 2021 a garin Ilorin jihar, yayin rufe gasar wasanni ta matasa ‘yan kasa da shekaru 15 da aka gudanar a jihar.

AbdulRazaq ya kuma tabbatar da cewa dukkan wasu shirye-shirye da suka kamata a yi yayin gudanar da gasar tuni jihar tasa ta Tanadesu.

Gasar da aka gudanar a jihar ta Kwara itace karo ta 6 da ake gudanarwa a kasar nan, inda ake gudanar da wasanni daban-daban tsakanin matasan kasar.

Jihar ta Kwara dai yayin gasar ta kare a matsayin ta 6 daga cikin jihohin kasar nan da suka halarci gasar.

Ta kuma samu damar lashe kyautar sarkar Zinare 10 da ta Azurfa itama 10 sai kuma Tagulla guda 12.