Kalaman Ɓatanci: PDP ta nemi Ali Baba ya bai wa Kwankwaso haƙuri

Jam’iyyar PDP mai adawa a Kano ta bai wa mai bai wa gwamnan Kano shawara kan al’amuran addinai Ali Baba A Gama Lafiya Fagge wa’adin awanni 48 kan ya nemi afuwar tsohon gwamna Injiniya Rabi’u Kwankwaso.

Sakataren yaɗa labaran jam’iyyar na Kano Bashir Sanata ne ya bayyana hakan a zantawarsa da Freedom Radio.

Sanata ya ce, suna neman Ali Baban ya nemi afuwar Kwankwason kan kalaman da ya yi na ɓatanci a kan sa na zargin shi ne ya mallaki gidajen man Aliko Oil.

A ranar Lahadi ne dai ƴan sanda suka bada belin Ali Baba Fagge, bayan da ya janye kalaman da ya yi na jingina gidan man Alikon da tsohon gwamna Kwankwaso.