Kamata yayi a tsawaita dokar hana zirga-zirgar jirage zuwa wasu jihohin – ACF

Kungiyar dattawan Arewa ta bukaci shugaban kasa Muhammadu Buhari da ya tsawaita dokar hana zirga-zirgar jirgin sama a Zamfara da aka yi a baya-bayan nan zuwa wasu jihohin da ke fama da hare-haren ‘yan bindiga.

A jiya Talata ne Buhari ya ayyana Zamfara a matsayin “yankin da aka haramtawa jirage yin shawagi” sannan ya haramta duk wasu ayyukan hakar ma’adanai a jihar.

Umarnin, wanda mai ba shi shawara a kan harkokin tsaro, Babagana Monguno ya bayyana, ya biyo bayan sakin daliban 279 na Makarantar Sakandaren Gwamnati da ke Jangebe a karamar Hukumar Talata-Mafara da ’yan bindiga suka sace.

A wata sanarwa a yau laraba da shugaban kungiyar ta ACF Audu Ogbeh ya fitar na yabawa da umarnin, sai dai yace akwai bukatar yin irin wannan umarnin a wasu jihohi kamar Benue Taraba da Borno inda ake rade-radin cewa jirage masu saukar ungulu suna yawan ajiye makamai don ‘yan fashi da masu tayar da kayar baya.